dio dio的部落格

星期日天朗氣清，離開公司，見到天上嘅雲海幾靚，

著長袖衫仲熱到出汗添，咁好天氣梗係要影低佢~~

望天打卦完畢，就搭巴士返屋企，坐坐吓車，發覺眼前有個黑點左搖右擺，

我心諗：「唔係有飛蚊症卦？有都唔駛咁大粒.....」

眼球zoom近對焦，咦！個黑點仲會腳仔爬爬，

原來有隻蜘蛛沿住我頂帽嘅帽舌，吐絲垂吊而下，撞鬼你丫，

於是我咪急急除左頂帽，隻蜘蛛又幾醒，即刻縮番條絲爬上去，

喺我頂帽度走嚟走去，你嚇我一野，我當然要......同你影下相啦！

可惜車廂太暗，影唔清隻野嘅近鏡，咁多人又費事開閃光燈，

隨時俾人誤會我想影裙底春光嘛~~其他乘客見我拎住頂帽轉嚟轉去，

都唔知我影乜，有時仲聽見：「喂！望住鏡頭笑一笑啦！」

紛紛投以奇異目光，以為有個黐線佬坐咗上車....正所謂上天有好生之德，

最後我都放走咗隻蜘蛛，佢仲依依不捨，望咗我一輪先離開....

夜晚喺屋企瞓覺，又發覺有隻野喺我塊面搞搞陣，隻蜘蛛唔係玩跟蹤，

跟到我返屋企咁長情卦？開燈一睇，原來係隻飛蛾...

喂喂，燈蛾唔係撲火咩？撲埋我塊面把鬼咩？我都懶得搵相機影低佢，

費事攝左佢嘅靈魂出嚟就唔好啦，隨時係先祖有嘢搵我傾嘛，

於是咪急急再瞓，諗住等佢報夢話俾我聽下期六合彩開乜嘢號碼，

點知佢成晚纏住我，我又點同你夢會呀飛蛾姐姐....

各位昆蟲朋友，我已經係白骨精，唔需要再變蜘蛛精或蛾妖，

多謝你哋嘅「熱情款待」呀！